سلوكيات .. لا تصنع تقدم …
علي مقهي في الشارع “الاقتصادي “
بقلم د يسري الشرقاوي رئيس جمعية رجال الأعمال المصريين الأفارقة ومستشار الاستثمار الدولي
من الحاجات الصعبة اللي اتأكدلك ان فعلا عندنا مشكلة كبيرة جدا في مفهوم البيزنس والاعمال والاقتصاد في ثقافة العامة وما اكثرهم .. لدينا عدد كبير من الناس ..
لديهم عبارات شهيرة ممكن تسمعها فقط من المصريين كل يوم تقريبا
المشهد الاول في المقهي …
” شوفلي مستثمر ” … تلاقي كل اللي يقابلك عامل نفسه مكتشف الامريكتين وعنده فكرة مشروع احساسه هوه فقط لنفسه انه المتفرد بذاته العظيم بجلاله في الابتكار والاختراع وانه لديه معجزة ستحقق ازباح تسد ديون العالم .. بس كل همه انك انت تجبله مستثمر ودي بالنسبه لخياله حاجه بسيطة وبعدين انت هتعمل ايه دا انت بس هتوصل دا ب دا وخدمة يعني هو انت عملت اية ؟؟… طيب تسأله معاك دراسة جدوي حديثة يقولك ” نشوف” طيب ايه الضمانات .. يقولك لا ضمانات ايه ما كنت روحت البنك ،، انا عاوزه شريك يتحمل معايا المكسب والخسارة من الاخر حد ياباشا ” نقلبه” بس ما بيقولهاش طبعا .. تقوله طيب مين في الكون هيجي يتحمل خسارة افكارك النبيلة وطلعاتك الهمام .. ميردش !! يتوقف !!
المهم .. انت لازم بقي امامه تكون جدع وتشوف له مستثمر .. والغالبيه بتقولك المواصفات :-
– يكون مستثمر كويس
– وياخد حصة ما تزدش عن ١٠٪ ويدفع استثمارات المشروع كله لان احنا اذكي شعب ف الكون طبعاً ،، ونسبة بسيطة اقلية علشان نعرف نمرمطه كويس لما المشروع ينجح ..
الخلاصة .. تجد الغالبيه لايملك الا الفكرة وتلات ورقات اه والله ٣ ورقات .. والفكرة مسروقة الف مرة ومقلدة ١٠ الاف مرة وفاشله او تجد مطور عقاري تاجر رمال اموال عامه و واخد قروض وجامع مقدمات من مشتريين ومافيش مانع يقلب مستثمر برضه ليه لأ؟؟ ما هي فوضي .. دا غير طبعا اننا لدينا ماضي سحيق مع الشراكات الاستثمارية الصغيرة والمتوسطة مع بعض اثرياء دول الجوار وخرجوا منها بلا ملابس وتاهوا في دروب المحاكم والادابرة وموظفي فوت علينا بكره في الفض في النزاعات …انها مأساة علي مقهي في الشارع الاقتصادي
المشهد الثاني في المقهي .. هو تلك العبارة الشهيرة التي تسمعها ف اليوم ١٥ مرة .. ان شخصا ما يملك شركة او مصنع معقول !! او لا يملك مجرد محاولة لانه سمع ان التصدير حلو .. تجده بمنتهي الثقة .. يسألك وهو لا يعرفك من الاساس ،،، ياباشا عاوزين نصدّر .. عاوزين نفتح شغل ياباشا … انا عارف ان علاقاتك بره كويسه .. ثقة مجانية .. يسالك بقوة وعشم قاتله فعلا ..ما تشوف لنا بيعه لاي حاجه اي منتج !!!!! اي بيعة وانا اجبلك لبن العصفور ..شوف الخليج صحابك او افريقيا اصدقائك عاوزين ايه من مصر .. واحنا جاهزين … وهوه ما عندوش منتجات اصلا .. تبدأ تسأله
انت صدرت فين قبل كده ؟ طبعا مافيش ؟
طيب عندك شركة او مصنع ؟ طيب زرت كم دولة ؟ زرت كم معرض خارجي ؟ ممكن تسمع اه وممكن لأ
طيب عندك مدير تصدير كفء
طيب عندك البنية التحتية للتصدير ؟
طيب عندك ميزانية للتسويق الخارجي والتصدير؟
طيب عندك ملاءة مالية جاهزة للانفاق ع فتح اسواق اخري
عندك محاسبين كفء للتعامل ف التجارة الدولية ؟
طيب عندك نظام للعقود الدولية ؟
يرد عليك ..
يقولك ياباشا ” عاوزين اي بيعه ” بس ونعمل لسيادتك عمولة … تجد نفسك مسترخي مبتسماً علي العقلية التي عاشت ٤٠ عاماً في ظلام بعيدة تماما عن الاحترافية الدولية .. وان هناك ٥٠ مليون سمسار يبيعون شقة وكلهم منتظرون العمولة لكنك تلتقي باخر واحد في ال٥٠ مليون ورقم مالك الشقة مع الاول في ال٥٠ مليون وان الصراع هو توزيع عمولة ٢.٥ ٪ عندما تباع الشقة علي ال٥٠ مليون مع ان اصل المشكلة ان ما فيش شقة للبيع من الاساس
ولسه مشاهد كثير قادمة … حاجه مأساة